29 December 2016

إعترافات

لما بدأت تدوين كنت محتاجة أكتب وبس
كنت خارجة من تجربة فاشلة جداً
تجربة وجعتنى أوى و قضت على حاجات كتير حلوة
تجربة استنفذت كل قواى و كنت فاكرة إنها مسابتليش أى حاجة ممكن أبدأ من خلالها
قبل التجربة القاسية دى بكام سنة
كان فى تجربة أولى

قصة حب
كانت حلوة جداً رغم إنها ماكملتش
كانت مفرحة و مبهجة و فيها كل حاجة حلوة
كانت بتزرع جوايا كل يوم قوة و قدرة على إنى أحلم و يبقالى طموح
كانت بتنمى الزرع و تقويه
كانت بتقوى القلب أوى
فاكرة كويس أوى ساعتها إنى كنت بمشى أدب رجلى على الارض بقوة
كأنى بقول للدنيا أنا أهو قوية أوى و جميلة أوى و نَفسى راضية أوى
كان كل يوم بيعدى كل واحد فينا بيفرح من قلبه و بيقوى ع الدنيا و بيثبت رجليه ف الأرض
كل لحظاتنا كان فرحة و مكنش فى أى خوف أو قلق
كل واحد فينا كان بيملى التانى بالأحلام و القوة و كنا بنجدد أحلامنا و أفكارنا مع كل طلعة شمس
لما قصة الحب دى مكملتش لأسباب معينة
أنا و الطرف التانى سبنا بعض و إحنا بنحترم بعض أوى
و بنقدّر بعض اوى
و مفتكرش أبداً ان أى حد فينا ممكن يكون بيحمل للتانى أى حاجة غير المشاعر الحلوة و الإحترام و الذكرى الطيبة

لما دخلت تجربتى التانية كنت متوقعة إن الطرف التانى هيقوينى زى أى اتنين بيحبوا بعض
لكن ده محصلش لان الطرف التانى أكيد محبنيش هو حب نفسه بس
والدليل إنه مدانيش اللى يقوينى
هو أخد منى اللى يقويه و يهدنى
أخد قوة قلبى و طموحى و أحلامى و أفكارى و مشاعر
أخدهم لنفسه و محطش مكانهم أى حاجة تانية ممكن تملى فراغم غير نفسه
 كان على طول يقنعنى إنه بيخاف عليا و بيحبنى لكن ده مش صح
لو افتكرت حاجة من التجربة دى مبفتكرش غير القسوة و الأنانية

منكرش أن قصة الحب و التجربة الفاشلة كانوا سبب ف تغيرات كتيرة أوى فى حياتى
قصة الحب لانها قصة حب خلتنى أحب الحياة و الدنيا و الناس خلتنى قوية ولما إنتهت سابتلى طاقة كبيرة أوى اقدر بعدها استمر فى حياتى رغم إن أكيد إنتهاءها مكنش بيمثل أى نوع من السعادة و أكيد كان مؤلم وأكيد خدت وقت طويل أوى بعدها على ما دخلت ف التجربة التانية
 أخدت سنين على ما عرفت أتعايش منغير الحد اللى كان بيجدد ضحكتى مع كل طلعة شمس
أما التجربة التانية خلتنى أخاف من حاجات كتير أوى خلتنى ضعيفة و هشه كنت حاسه بعدها بعدم رغبة ف الحياة و المجتمع و الناس عدم قدرة على الضحك لأن الطرف التانى كان تقريباً لم كل الضحكات اللى ممكن يضحكها قلبى و حطها ف جيبه و مشى

بشكرهم الأتنين من قلبى
بشكر اللى خلانى أشوف حاجات حلوة كتير ف الدنيا و اتعلمت منه حاجات كتير و قوانى على حاجات كتير و سابلى حرية الحلم و الضحك و الحياة
و بشكر اللى ألمنى و أخد منى كل أحلامى و سابنى بلا حلم

لولاكم انتم الأتنين مكنتش هبقى كده
مكنتش هبقى عاقلة ف حاجات كتير
و مجنونة ف حاجات تانية
مكنتش هتعلم الصبر
مكنتش هكتشف نفسى زى ما أنا مكتشفاها دلوقتى

والأهم من كل ده
مكنتش هقابل عصام و احبه

شكراً أوى على نعمك يا رب
شكراً أوى على كل حاجة اديتهالى ف حياتى
شكراً أوى يا رب على كل حاجة وحشة و حلوة
لان لولا الوحش مكنتش عرفت قيمة الحلو
ولولا الحلو مكنتش فهمت إن ده وحش

شكراً إنك وهبتنى عصام