26 January 2011

ثورة

ثورة
كل الشعب بيعمل ثورة
شباب الفيس بوك الفرافير عاملين ثورة
مهياش ثورة جياع
مهياش ثورة عشوائيات
ثورة ناس متعلمة
ثورة ناس بتفهم
ثورة ناس عايزة تقول لأ بصوت عالى
انا مش واحدة من الفرافير
أنا نفسى فى بيت يلمنى أنا وحبيبى
وأقل بيت بكام ميت ألف جنية
وكله بفضل عز بيه
نفسى فى تعليم نضيف لولادى
وأحسن مدرسة بتعلم بجد فى المعادى
ومصاريفها هىء هىء يا عينى يا ولادى
نفسى فى رغيف عيش نظيف
مش ألمه من على الرصيف
ونفسى أصرخ زى كل اللى بيصرخوا
أهد الدنيا بالصراخ
أبويا بيحكيلى زمان عن البلد
عن مصر الأمن والأمان
عن الحرية
عن التعليم
عن البعثات
عن الألم
عن الإنجليز
عن بونابرت
عن الفراعنة
عن الإستعمار
بقى إستعمارك منك فيكى
تلاتين سنة يا بلدى
ده لو كان نابليون فضل فيكى
كان خلاكى أحلى من فرنسا
كان علّم شبابك وثقفهم
وفرلهم شغل وحياة
إداهم أكل يكلوه
فاكره زمان أغانى عبد الحليم وشادية
والوطن العربى
وعبد الوهاب
وأشعار أحمد شوقى وإبراهيم ناجى
نفسى يا بلد أحس بكل اللى أتعلمناه فى المدرسة
وأنا صغيرة
نفسى تحابى عليا
علشان أخاف عليكى
علشان مسبكيش وأطفش
علشان أفديكى بدمى
زى خالى وإبن عمى

وبيحجموكى يا ثورة

ليه بيحرمونى من بلدى
أنا أسمى مصرية
وجدودى مصريين
حقى أحبك يا بلد
وحقك تدينى
حقك أفديكى
وحقى تحبينى

عينى عليا وعليكى



11 January 2011

لن تعود يوماً رجلاّ يملأ عينى



حتى و إن جئتنى صانعاً من النجوم عقداً يزّين رقبتى

حتى وإن ملأت الدنيا بزهور عصفور الجنة

حتى وإن قدمت لى أجمل عطور الحياة

لن تعود يوماً رجلاّ يملأ عينى