قرار الجواز قرار مصيرى ناس كتير بتهرب منه لانه شايفين الناس اللى متجوزة وهى عايشة ف نكد دائم
متتجوزش
متتجوزش غير لما تكون متقبل فكرة إن حياتك هتتغير مش لشىء سىء بالعكس لشىء كويس بس لازم تكون متقبل فكرة التغيير ف حد ذاتها
متقبل فكرة إن فى طرف تانى هيكون مسئول منك
طرف إنت مطالب أنك توفيله مطالبه المعنوية قبل المادية
أنت مطالب إنك تطمن عليه بإستمرار و تطمنه عليك
مطالب إنك تبينله إهتمامك و رعايتك ليه
مطالب إنك تحكى معاه ف الللى مضايقك و تاخد رأيه
مطالب إنك تشاركه كل أحزانك قبل أفراحك
متتجوزيش علشان تتجوزى والسلام
إتجوزى الحد اللى إنتى مقتنعه إنك مش هتدمريله حياته
هتسبيه يفرح علشان يفرحك
إتجوزى لما تحسى إنك هتعرفى تشيلى مسئوليته صح
وإنه لما يعتمد عليكى ف شىء هتكونى قد المسئولية
محدش يتجوز غير لما يختار الشخص اللى يقدر يفكر معاه و يتقبل عيوبه
فكروا ف العيوب قبل المميزات لأننا مبنقدرش نتعامل مع العيوب
الحياة حرية وفكرة الحرية ف حد ذاتها للأسف ناس كتير بترفضها ف علاقتها
الحرية هى سر من أسرار السعادة
محدش يقيد الطرف التانى
أتعاملوا على إنكم أصحاب
العلاقة الزوجية زى الإزازة بتفضى بمرور الوقت لو فضلت تسحب منها منغير ما تملاها
وعلشان تتملى لازم الطرفين يجددوا ف حياتهم بعيد عن بعض
مش لازم يبقى أصحابهم مشتركين و خروجاتهم واحدة و طريقتهم واحدة لأن ده بيخنق
و اللإختناق بداية الفشل
إستمد طاقة من المجتمع اللى حواليك من معرفك و أصحابك
من السفر و الفسح
و إملى بيه الإزازة
إستمدى طاقة من الناس اللى حواليكى
إعرفى ناس جديدة بإستمرار و خلى ليكى شخصية تقدر تاخد قرارات
وإملى الإزازة
والطرفين لازم يعرفوا شىء مهم إن أسرار حياتهم مهما كان ليهم من صحاب دى أسرار حياة
أسرار حياة
محدش يتجوز غير لما يقتنع إنه هيتغيّر من فكرة أنا عايش لنفسى
لأنها هتبقى أنا عايش لان فى حد يهمه أمر إنى أكون عايش علشانه
