من كام يوم جالى ألم شديد فى أذنى و حسيت إن ضغط الهوا فيها جامد أوى
أخدت مسكن و سرحت بخيالى العظيم
يا ترى لو صحيت الصبح و لقيتنى فقدت حاسة السمع
لو لقيتنى مبسمعش حاجة
مش سامعه الناس ولا الدوشة
مش سامعه جرس الباب ولا كلاكس العربية
مش سامعه إبنى لما بيخلص تواليت و يندهلى
أو بنتى لما تصحى من النوم خايفة تنادى عليا
مش سامعه جوزى لما بيقولى إنى وحشته
مش سامعه نفسى
ولا صوتى
ولا حاسه بوجودى
لو فقدت حاسه السمع
هفقد الإحساس
يمكن لو فقدت النظر مش هبقى كده
لكن إنت بتحس لما بتسمع
بتحس الخوف والضعف والأمان من الصوت اللى بتسمعه
بتحس لو زعلان أو فرحان أو قلقان أو موجوع
بتحس اللى بيحبوك
بتحس اللى بيخافوا عليك
يارب ما تحرمنى من نعمك عليا
No comments:
Post a Comment