النهاردة دخلت أنا و سلمى السنيما
فيلم أختى أقنعتنى إنى لازم أدخله لسلمى لأنه هيفرق معاها
كمان كنت قرأت مقال صغير عن الفيلم ف حسيت بإقتناع أكتر إنى أدخلها
طول الوقت كنت بترجم ل سلمى الحكاية بس مكنتش متضرره خالص من حاجة زى كده خصوصاً لما خلص الفيلم و لقيت إنها وصلها المغزى من الفيلم و إنها إستوعبت القصة
Wonder
قد أيه فيلم رائع بكافة المقاييس
دموعى نزلت فى مشاهد كتييير أوى فيه
الطفل أوغى اللى إتولد بتشوهات جينية قوية و عمل ما يُقارب ال 20 عملية علشان يقدر يتنفس و يسمع و يتكلم
علشان يبقى عنده أنف و أذن و فم
أمه وقفت حياتها من يوم ولادته وبقت حياته هى محور البيت
إجتهدت فى تعليمه و تربيته
لحد ما جه الوقت اللى لازم يروح مدرسة
ويحتك بالعالم
هو كان بيتنكر من نظرات الناس فى خوذة رائد فضاء
كان بالنسبة له الهالويين هو أحلى عيد علشان يقدر يتنكر فى أى شكل و يحتك بالناس منغير ما حد يشوفه
لكن فى المدرسة ممنوع
إزاى طفل صغير يقدر يتحمل كل ده و يتعايش معاه
ويثبت للناس كلها إنه له حق ولازم ياخده
الفيلم فى مشاهد قوية و رهيبة من أحسنهم مشهد الأم لما تلاقى إن إبنها بقى ليه صاحب
والفرحة والخوف والصدمة والإرتباك
كل ده فى نظرة عينيها
الفيلم يستحق المشاهدة و بقوة
أى حد عنده طفل فى حدود الخمس سنوات فيما فوق لازم يوديه الفيلم ده
لانه بيعلم الرحمة و حسن المعاملة والقوة والقدرة
وقيم تانية كتيرة جميلة
No comments:
Post a Comment