خلى الناس تحب

النهاردة صدفة وقعت تحت أيدى أغنية خلى الناس تحب بتاعت يسرا
كنت من كتييير اوى مسمعتهاش


حب خلى الناس تحب روح للناس يا حب
الحب ما لينا غيره والله ما لينا غيره
يدفينا ينسينا يمحى الحزن بينا
نلقى الخير سفينة تعدى بينا ترسى بينا لبر حب

حاجة جميلة اوى ان الواحد يحس ان هو بيحب الناس والناس اللى حواليه بيحبوه

وسألت نفسى ليه ربنا خلق حاجة اسمها الحب
رغم ان الحب ده اوقات كتيرة اوى بيتعب الناس وبيكون السبب ف مشاكل كتير اوى

ولقيت ان إجابة السؤال واضحة اوى

ربنا خلق نعمة الحب عشان يعرفنا يعنى ايه خصام ويعنى ايه تسامح
يعنى ايه رحمة ويعنى ايه ألم
يعنى ايه مغفرة ويعنى ايه قسوة
يعنى ايه ود ويعنى ايه صلة رحم
يعنى ايه رأفة
علشان نعرف ازاى نحب ربنا علشان يحبنا
ازاى نحس بقيمة رحمة ربنا لما نرحم الناس حوالينا
ازاى نحس بقيمة العفو والغفران لما نعفو ونغفر للى حوالينا
ازاى نحس بقيمة التسامح
علشان ربنا يسامحنا ويغفر لنا ويعفو عنا ويرحمنا
علشان هو بيحبنا

ازاى نحب ربنا
نحب نقابله
نحب نحس القرآن وإحنا بنقراه
نحب نعمل كل حاجة تخليه يحبنا

أكتشفت أن الحب ده من أجمل نعم ربنا علينا

لو كلنا حبينا بعض
الدنيا هتبقى حلوة اوى من حوالينا
ليه كل واحد ميفكرش ف انه يجرب فترة يعيش يحب كل اللى حواليه
حتى الناس اللى مضايقينه او مش بيحبهم
بس يجرب فترة من الوقت ويشوف بعدها هيحصل ايه

ده نعمة حلوة اوى يارب ديمها علينا