مرض الفضول اللعين

مرض يصيب الكثير من الناس

عارفة ده

والأكثر والأكيد البنات

مرض الفضول اللعين

لكن الألعن بقى انه يبقى يصيب للرجال كمان

طب البنات ودماغها اوقات كتير اوى بتبقى فاضية، ومش لاقية حاجة تعملها، فبتشغل نفسها بأى حاجة وتفضل تدور على اى حاجة ترغى فيها وتشغل بالها بيها

لكن لما يبقى ولد بقى أو راجل كده ملو هدومه وتلاقيه فضولى وتطفلى يبقى ايه

حاجة غريبة والله

يبقى الواحد قاعد كده فى أمان الله تلاقى اللى جاى يحكيلك تاريخ حياتك وتلاقى اللى قدامك متابعك فى كل حاجة كأنك تحت ميكروسكوب عينيه، أمتى كنت متضايق، أمتى كنت فرحان، أمتى كنت معصب، أمتى كنت زعلان ،،، لما خلاص الواحد مبقاش فاهم

وكمان ممكن تقابل حد لأول مرة فى حياتك تلاقيه فى نص ساعة بيعاملك على أنك صاحبه من سنين وياخده العشم اوى والعشرة مبتهونش غير على ولاد الحرام وأوعى متسألش أو متتصلش وهستناك بقى متغبش عليا وأوعى تنسى اللى طلبته منك والله يكرمك تبقى فعلاً صاحبى بجد لو عملتلى الخدمة دى ،،، وكل العشرة اللى بينكوا يادوب نص ساعة

وكمان فى ناس تبقى هتموت وتعرف أخبار الناس اللى حواليها وكأن فى أخبار الناس اللى حواليها دى روحهم يعنى لو معرفتش الخبر ده ممكن تصاب بصدمة نفسية أو سكتة قلبية كده ولا أى حاجة من الكلام ده

فى ناس تانية بقى شغلها الشاغل والأوحد والأهم والأسمى والأقصى وكل الكلام الكبير ده أنها تجمع معلومات فقط لا غير،

لازم تكون عندها كل الأخبار عن كل الناس فى كل حته مش شرط أنها تبقى قناة الجزيرة للأخبار بس علشان تبقى هى مركز المعلومات وكمان لازم تكون متابعة أول بأول آخر الأحداث اللاست أبديت يعنى للأخبار وتكون الأخبار دى موثوق فيها علشان لما حد يشكك فى الخبر يرجع للمصدر أُمال أيه

بعض الناس فضولها يكمن فى معرفة ماركة الهدوم اللى لابساها الناس يعنى جايباها منين وبكام وأمتى وفين والكلام ده

أنا نفسى فى فترة من فترات حياتى كنت بهتم جداً بألوان الشورابات اللى بتلبسها الناس وأول حاجة ممكن أبص عليا فى اللى قدامى لون الشوراب كأن الناس عبارة عن ألوان شورابات ،، والله حاجة عجيبة

طب بنات ودماغهم فاضية ،، يا حرام الواحده مورهاش غير البيت والدراسة أو الشغل وبس

الصدمة بقى إن المرض ده مبقاش فى البنات وبس

دى العدوى أنتقلت

لو بس كل واحد يخليه فى حاله وميشغلش باله بغيره